لمتين العودة يا مطر؟
في غيابك
العصافير فأتت الاعشاش
وجوف الأرض
ما عرف طعم الرشاش
الضل الكبير إنحسر
والمرق الكبير إنكسر
والقوافي ما عرفت لإبي ذر
الغفاري أثر
كل ما أقبل ألقى السؤال
سابق الأجابة
مرة في وجوه الجياع
ومرة على أرصفة الضياع
ومرة في الآهة المارقة
من المصنع
ومرة في الطورية البتزرع
ومرة في دعوات زولا ليلا
ونهارا بيركع
ومرة من كل الشوارع
وهي بتسأل
متين العودة يا مطر؟
حث خطاك يا مطر
الناس الغبش
في رجاك
ممسكين بعصب
الصبر
حث خطاك
أطرد الموت
والخراب
والشتات
والخوف من المجهول
والوجع المخبأ
في الصمت
والكلام
والحروف
والنيل
في الجروف
والطوابي
والبوادي
والحضر
حث خطاك
وأختصر المسافة
واسي الدمع الحزين
حث خطاك يا مطر
الوطن المستباح
في شهقة الرمق الأخير
About The Author
